السلام عليكم ورحمه الله وبركاته
سبحان الله وبحمده سبحانك ربى العظيم
ازيكو
طريقه النهارده اغلبنا عارفها
نبدا بسم الله
اولا
نسلق لحمه عادى خالص وقبل السوا بشويه لو مستعجله
نطلع كام حته لحمه او على حسب عدد عيلتك
ونقطعهم مكعبات انا بحب اقطعه موسطن
وتحضرى طاسه فيها معلقتين زبده وتحطى فيها قطع اللحمه كانك بتحمريها
ورشه فلفل اسود وحبه ملح فوقها كدا
وطبعا تكونى محضره معيار كوبايتين ارز مغسلوين
وتحضرى طاجن او صنيه اللى عندك
وتحطى شويه ارز فى القعر وترسى فوقهم اللحمه زى كدا
طاجن ارز معمر باللحم وطشه ملوخيه من مطبخى بالصور
وبعدين يا قمرات نكمل باقى الارز فوق اللحمه
وتحطى نفس مقدار الارز لبن على شوربه
وتسقى بيه الطاجن وشويه ملح فى الاخر وحته زبده
زى كدا
طاجن ارز معمر باللحم وطشه ملوخيه من مطبخى بالصور
وعلى الفرن انا فرنى بيشتغل الشوايه والفرن سوا
لو عندك دا لوحده ودا لوحده حطيه تحت الشوايه يحمر الوش الاول وبعدين نزليه تحت يستوى
سمعاكى يالى بتقولى عليا دى معفنه شوفو الحاجات السمره دى . دا فلفل علفكره باضحك
لما يتشرب هدى عليه النار وسيبيه يتلدن
ودا شكلو الاخير شايفين مفلفل مش معجن واللحمه اهى يا ولاد ظهرت اخيرا باضحك
زى كدا
طاجن ارز معمر باللحم وطشه ملوخيه من مطبخى بالصور
الشبوره دى دخانه السخونه بتاعه الارز ابتسامة
وعلفكره دى نفس طريقه الحمام المدسوس فى الارز المعمر ونفس طريقه الفراج البلدى المدسوسه بردو بس بدل اللحمه حمام او فراخ بلدى بتبئى تحفه
نيجى للملوخيه
بعد ما سلقت اللحمه وطابت هنشلها واحمرها واحطها على جنب
والشوربه على جنب ونكون قطفنا الملوجيه وغسلناها وخرطناها
واللى ملهاش بال فى تخريط الملوخيه ناعم زى حلاتى
خرطيها شويه وبعدين على الخلاط بشويه شوربه صغننه يادوب تغطى سكينه الخلاط
ونعمى على راحتك
بجيب حله مع معلقه زبده بقرى او اى زبده انا بحب البقرى عشان خفيفه
على معلقه صلصه صغننه وتشويحه وننزل بالشوربه
واول ما تغلى نهدى النار وننزل بالملوخيه
وتكونى حاطه على العين التانيه طاسه بمعلقه زبده
وتنزلى بالتوم المدقوق كويس وكزبره ناشفه ورشه جوزه الطيب
وتطشى الملوخيه
ودى تطشتى وشهقت وكل حاجه احلى ابتسامة
طاجن ارز معمر باللحم وطشه ملوخيه من مطبخى بالصور
وكلو من مطبخى والله ماخدتوش من النت ولا حاجه
ودى كانت اكلتى النهارده يارب اكون افدتكم
ارز معمر باللحم ولحمه مسلوقه ومحمره وملوخيه
لا يوجد حالياً أي تعليق